Esposición temporal

Intruducción

El valle d’El Ríu Sella acueye una de les concentraciones más importantes de xacimientos prehistóricos del suroeste d’Europa. Nes sos cueves y averos, localizaos particularmente alredor de la desembocadura, pero tamién nos valles de los sos afluentes principales, Piloña y Güeña, documentáronse ocupaciones que garren, lo menos, los últimos 200.000 de la Historia de la Humanidá n’Asturies. Esti territoriu valió d’hábitat tanto a los grupos neandertales (Homo neanderthalensis), creadores de les industries del Paleolíticu mediu (Musteriense) como a los primeros humanos modernos (Homo sapiens), quien ellaboraron les industries más recién, del Paleolíticu superior y del Mesolíticu.

La historia de les investigaciones arqueolóxiques nel valle del Sella tien una tradición llarga que se remonta a últimos del sieglu XIX, una de les más antigües del suroeste d’Europa. Dende esi momentu, un númberu grande d’investigadores contribuyó a dar a conocer los descubrimientos arqueolóxicos y l’arte parietal de los sitios prehistóricos riosellanos, faciendo que seyan conocíos a nivel mundial.

Esta esposición, financiada pola Conseyería de Cultura, Política Llingüistica y Deporte del Gobiernu del Principáu d’Asturies, que se lleva a cabu nel Centru d’Arte Rupestre de Tito Bustillo, quier facer un percorríu pela historia de les investigaciones prehistóriques nel valle del Sella. Ta centrada nos homes y muyeres, los y les investigadores, que sacaron a la lluz una parte pequeña de los nicios que los grupos de cazadores-recolectores-mariscadores dexaron nesti territoriu asturianu, aplicando pa eso los métodos y técniques arqueolóxiques vixentes en cada momentu y que, amás, difundieron el Patrimoniu asturianu internacionalmente.

Muéstrense, d’un llau, delles síntesis de los trabayos realizaos nesti territoriu dende últimos del sieglu XIX a anguaño. D’esta manera, definiéronse delles etapes: primeres investigaciones, los trabayos de Francisco Jordá Cerdá nel cursu baxu del Sella, los realizaos nes dos décades últimes del sieglu XX y nos últimos 25 años. Incorporáronse, amás, dos aspectos tresversales, relativos a la historia de les investigaciones de los estudios del arte parietal y al papel xugáu poles investigadores nos estudios de la Prehistoria de la rexón, respectivamente. D’otra manera, inclúyense les semblances de los principales investigadores qu’a lo llargo de los más de 150 años fixeron estudios prehistóricos nel valle del Sella.

1. PRIMERES INVESTIGACIONES PREHISTÓRIQUES NEL VALLE DEL SELLA (1836-1917)

El conocimientu de la prehistoria na cuenca del Sella empieza nel sieglu XIX y transita, dende les primeras observaciones científiques, pela actividá d’aficionaos, anticuarios y coleccionistes hasta los trabayos llevaos a cabu por miembros de sociedaes científiques, como l’Institutu de Paleontoloxía Humana de París y la Comisión d’Investigaciones Paleontolóxiques y Prehistóriques (CIPP).

Les primeres referencies va anotales l’inxenieru de mines Guillermo Schulz. Nos sos trabayos de campu, fechos ente 1836 y 1943, va identificar en Ribeseya la cueva de Collera, depués conocida como San Antonio, onde atopó «güesos antediluviales y munchas cáscares», testimoniu de les actividaes de subsistencia de grupos humanos prehistóricos.

L’actividá de los coleccionistes arqueolóxicos nel territoriu foi intensa, destacando les figures d’Antonio Cortés, Frassinelli y Soto Cortés. Les estructures megalítiques foron l’oxetu del so interés principal, llevando a cabu remociones nos dólmenes de Santa Cruz, Mián o Abamia. La so erudición dexó-yos identificar y interpretar oxetos, pero la so falta de formación impidió-yos la llectura de los xacimientos arqueolóxicos y de los sos depósitos sedimentarios.

Daqué asemeyao va asocede-yos a los anticuaristas Juan de Dios de la Rada y Arturo Malibrán, unviaos pol Muséu Arqueolóxicu Nacional, quien visiten infructuosamente la Cuevona en 1869. Va haber qu’esperar hasta 1886, cuando l’inxenieru industrial Justo del Castillo, depués d’identificar útiles de sílex en Collubil (Amieva), va localizar na Cuevona de Ribeseya restos estensos d’una cascarera prehistórica.

Los primeros trabayos institucionales van dexar a Alcalde del Río, prospector del Institutu de Paleontoloxía Humana, reconocer en 1912 la primer muestra d’arte rupestre na cuenca, un caballu pintáu na cueva de San Antonio. Ente 1912 y 1917 miembros de la CIPP van llevar alantre una actividá arqueolóxica destacada pel territoriu: Hernández-Pacheco nes cueves d’Ardines; Vega del Sella, después d’una escavación nel dolmen de Santa Cruz y la so contornada, va intervenir en Collubil, la Cuevona y el Buxu, segunda cueva localizada con arte rupestre na cuenca; en 1915 Cabré va identificar les pintures del dolmen de Santa Cruz.

La decadencia de l’actividá investigadora institucional va venir determinada pola Primer Guerra Mundial y pola situación política, económica y social n’España, poniéndose fin a les investigaciones prehistóriques na cuenca del Sella, hasta la so revitalización a mediaos de los años 50 del sieglu XX.

Figura 1. Guillermo Schulz. Retratu de la Iconoteca Asturiano-Universitaria.
Figura 2. Justo del Castillo y Quintana. Semeya: Archivu familiar.
Figura 3. De derecha a esquierda: Eduardo Hernández Pacheco, Lucas Fernández Navarro y Hugo Obermaier nel MNCN, añu 1918. Semeya: Sociedá Peñalara.
Figura 4. D’esquierda a derecha: Hugo Obermaier, Conde de la Vega del Sella, el xeneral Brunete y Lana, el periodista Juan Pujol y Ricardo de la Rosa, gobernador civil de la provincia d’Uviéu. Semeya: Archivu d’Hugo Obermaier.

2. RICARDO DUQUE DE ESTRADA Y MARTÍNEZ DE MORENTIN, VIII CONDE DE LA VEGA DEL SELLA (Pamplona, 1870 - Nueva de Llanes, 1941)

El Conde de la Vega del Sella foi llicenciáu en Derechu, anque la so vocación verdadera foi la naturaleza (zooloxía, botánica, caza, agricultura, etc.) y l’arqueoloxía prehistórica, sobre manera paleolítica. Afincáu en Nueva de Llanes, Uviéu y Madrid, creó una biblioteca importante y exerció delles actividaes de mecenalgu.

Desempeñó cargos en sociedaes y patronatos científicos, y dellos cargos políticos provinciales y nacionales.

Foi providencial el contactu del conde con Eduardo Hernández-Pacheco en 1911, porque empezó una actividá incesante al calor de la llamada Comisión d’Investigaciones Paleontolóxiques y Prehistóriques. Na cuenca del Sella y ente 1891 y 1917 intervino de dalguna manera (descubrimientu, escavación, cooperación, estudiu) nos xacimientos del dolmen de la Santa Cruz de Cangues d’Onís, Collubil, Ferrán, La Cuevona d’Ardines y El Buxu. Sicasí, cuasi toles sos actuaciones nesta cuenca foron efímeres, anque fixo xunto a H. Obermaier (1877-1946) un estudiu fondu del arte rupestre de la Cueva del Buxu.

El Conde fixo aportaciones estraordinaries a la investigación prehistórica al traviés de dellos xacimientos emblemáticos del conceyu de Llanes, aportando conclusiones significatives rellacionaes cola técnica y métodu de la escavación arqueolóxica, publicándose nes monografíes de la Xunta p’Ampliación d’Estudios. Amás, estableció la secuencia paleolítica n’Asturies y, por estensión, de la rexón cantábrica, y descubrió que les pintures rupestres taban sellaes por una película de carbonatu cálcico, lo que xustificaba la so autenticidá y ayudaba a protexeles. Vega del Sella tuvo contactos con toles persones relevantes qu’investigaben sobre’l paleolíticu n’España, Francia y Portugal.

Figura 1. Ricardo Duque de Estrada (Conde de la Vega del Sella), retratu realizáu por José Prado Norniella, 1928. Muséu de Belles Artes d’Asturies.
Figura 2. Escavaciones arqueolóxiques na cueva d’Altamira, Cantabria, 1925. De esquierda a derecha: Conde de la Vega del Sella, Henri Breuil, Conde Bégouën y Hugo Obermaier.

3. EDUARDO HERNÁNDEZ-PACHECO Y ESTEVAN (Madrid, 1872 – Alcuéscar, Cáceres, 1965)

Eduardo Hernández-Pacheco y Estevan constituye una figura esencial na xénesis y el desenvolvimientu de los estudios prehistóricos españoles a lo llargo de les primeres décades del s. XX. Desenvolvió los sos estudios siguiendo dos llinies básiques d’actuación: la primera, centrada na escavación de xacimientos paleolíticos asturianos y la segunda, rellacionada cola protección y estudio del heriedu artísticu prehistóricu peninsular.

Les sos escavaciones arqueolóxiques caracterizáronse pola importancia concedida a la estratigrafía como métodu básicu pa la identificación cultural correcta de los materiales paleolíticos documentaos, tal como reflexó nos trabayos llevaos a cabu en cueves de La Moría d’Ardines (Ribeseya) ente los años 1912 y 1915: cueva del Ríu o de La Lloseta, Cuevona y cueva Viesca o del Tenis. Esa atención a la estratigrafía, xunto a la identificación y estudiu comparativu de los restos malacolóxicos marinos de les cavernes riosellanes, dexáron-y identificar un cambéu climáticu ente los momentos finales del Paleolíticu superior y la etapa mesolítica.

Al respective del estudiu del arte prehistóricu, los sos trabayos caracterizáronse pola rigorosidá nes técniques de documentación de les grafíes prehistóriques, y pol análisis acertáu de paralelos estilísticos pa l’asignación cultural correcta de les imáxenes pintaes y grabaes en xacimientos asturianos: Peña Tu (Llanes) en 1913 y cueva de La Peña (Candamu) ente 1914 y 1917. Años depués va aplicar estos mesmos criterios al estudiu del arte llevantín de xacimientos del centru, este y sur peninsular, y que-y van valir p’asignar una cronoloxía mesolítica pa estes representaciones.

Figura 1. Eduardo Hernández-Pacheco y Estevan. © Colección de retratos de la Facultá de Ciencies Xeolóxiques, Universidá Complutense de Madrid.
Figura 2. Escavaciones arqueolóxiques d’Eduardo Hernández-Pacheco y Paul Wernet na Cuevona d’Ardines.

4. FRANCISCO JORDÁ CERDÁ (Alcoy, Alicante, 1914 – Salamanca, 2004)

Francisco Jordá Cerdá foi un arqueólogu y prehistoriador alcoyán que desenvolvió’l so llabor investigador y docente na España de la segunda metá del sieglu XX. Asitiáu ente los «padres de la Prehistoria» —a los que conoció personalmente— y les xeneraciones actuales —a les que contribuyó a formar—, la so figura ye un referente de la Prehistoria y l’Arqueoloxía españoles. Iniciador n’España de la práctica arqueolóxica moderna qu’implica a investigadores d’otros campos del saber, la so obra caracterízase por contemplar una investigación tresdisciplinar, siempre abierta a idees y esperiencies nueves. Les sos hipótesis tan atrevíes y criticaes sobre l’orixe y cronoloxía del arte postpaleolíticu peninsular confirmáronles descubrimientos nuevos, ocurriendo lo mesmo coles sos opiniones sobre l’orixe tempranu de los castros asturianos. Tocante al Paleolíticu superior, la so obra sobre’l Solutrense tovía resulta imprescindible. Alloñáu de cualquier dogmatismu, la so trayectoria profesional y personal caracterizóse por una componente heterodoxa y un espíritu críticu marcáu que-y dexaron realizar una obra original, independiente y llibre d’atadures.

Tres d’unos comienzos difíciles nos primeros años de la dictadura derivaos de la so condición de republicanu, llegó a Asturies en 1952 pa dirixir el Serviciu d’Investigaciones Arqueolóxiques de la Diputación Provincial d’Asturies, cargu al qu’axuntó en 1954 el de director del Muséu Arqueolóxicu Provincial d’Uviéu y que compaxinó cola docencia nel Institutu Femenín y na Universidá d’Uviéu. Remató la so carrera docente y investigadora como catedráticu de Prehistoria na Universidá de Salamanca (1962-1984).

N’Asturies, destaquen los sos trabayos nel valle del Sella. El xacimientu de La Cuevona (Ardines) foi la so primer incursión nes cavidaes paleolítiques del valle tres de la so llegada a Asturies. A partir d’esi momentu, la so actividá nel conceyu de Ribeseya va facese constante a lo llargo de la segunda metá de los años cincuenta del sieglu XX, con intervenciones arqueolóxiques nos xacimientos paleolíticos de les cueves de La Lloseta (Ardines), Les Pedroses (El Carmen), Cova Rosa (Sardéu) y El Cierru (Fresnu), y n’otros sitios menores. Amás, a últimos de la década de los 60 y primeros de los 70 estudió les manifestaciones artístiques paleolítiques de la cueva d’El Pozu’l Ramu, agora conocida como Tito Bustillo. A últimos de los 70 y primeros de los 80 regresó a El Cierru y Cova Rosa, onde desenvolvió les más modernes técniques d’escavación de la dómina arrodiáu por un equipu multidisciplinar mozu ente los que destacó’l so alumnu Javier Fortea Pérez, catedráticu futuru de Prehistoria de la Universidá d’Uviéu.

Figura 1. Francisco Jordá Cerdá, años cincuenta del sieglu XX. Foto: Carmen Pardo.
Figura 2. D’esquierda a derecha: Luis Pericot, Henri Breuil, Juan B. Porcar, Henri Lothe y Fabrizio Mori nel simposiu «Arte Prehistórico del oeste mediterráneo y el Sahara», Watenstein, Austria, añu 1950. Semeya: Eduardo Ripoll.
Figura 3. De derecha a esquierda, Antonio Álvarez Alonso, Francisco Jordá Cerdá y Manuel Mallo, añu 1965. Semeya: Archivu Manuel Mallo.
Figura 4. Escavaciones arqueolóxiques en Cova Rosa, campaña de 1974. Nel centru, agachada, Socorro López Plaza y, a la so derecha, Jesús F. Jordá Pardo. Al fondu, Francisco Jordá Cerda. Semeya: Julián Bécares.

5. INVESTIGACIONES PREHISTÓRIQUES NEL VALLE DEL SELLA (1968-1998)

El descubrimientu d’El Pozu’l Ramu en 1968 revitalizó les investigaciones científiques. Sicasí, tardaron en llegar, yá que la Diputación Provincial priorizó’l desenvolvimientu del potencial turísticu de la cueva pa convertila na «Altamira d’Asturies». Asina, pa salvaguardar les sos inversiones y evitar la tutela del Ministeriu d’Educación y Ciencia constituyó en 1970 la Fundación Pública de Cueves. Pa controlar la investigación, encargó los trabayos de campu, dos años depués del descubrimientu, a Miguel Ángel García Guinea y a Magín Berenguer, pero la so intervención nun tuvo continuidá.

La dirección de les escavaciones encargóse en 1972 a Alfonso Moure Romanillo, prehistoriador santanderín mozu y esperimentáu, collaborador de la Comisaría Xeneral d’Escavaciones Arqueolóxiques y profesor del Departamentu de Prehistoria de la Universidá Complutense, dambos dirixíos por Martín Almagro Basch, catedráticu de Prehistoria y director del Muséu Arqueolóxicu Nacional. Moure y el so equipu entamaron un proyectu d’investigación interdisciplinar avanzáu que procuró l’estudiu integral de los espacios d’habitación y les manifestaciones artístiques.

Esto dexó reconstruyir con rigor la vida de los habitantes antiguos del valle y convirtió Tito Bustillo nun centru de formación pa una xeneración d’especialistes que diben protagonizar la investigación nes décades siguientes. Al empar, el descubrimientu del xacimientu de Los Azules en 1971 y les campañes en Cova Rosa, El Cierru y El Buxu arriquecieron el conocimientu sobre’l Paleolíticu superior y el Mesolíticu na rexón.

La medría de l’actividá arqueolóxica traxo consigo una conciencia mayor sobre la conservación del patrimoniu. Los prehistoriadores denunciaron dende mediaos de los años 70 que la esplotación comercial abusiva de les cueves diba llevar a la desapaición del arte rupestre. Las alministraciones reaccionaron y promovieron actuaciones conservadores en sitios señeros, como la cueva de la Peña de Candamu, ente otros.

A mediaos de los 80 tuvo llugar el trespasu de competencies al Principáu d’Asturies y la disolución de les estructures burocrátiques vieyes. A pesar de la escasez de recursos y la inestabilidá política, los resultaos d’esti periodu foron sobresalientes, afianzando’l Sella como una de les rexones prehistóriques más importantes de la Península Ibérica. La institucionalización y el desenvolvimientu de la investigación en delles universidaes españoles favoreció la multiplicación d’estudios y l’alministración autonómica impulsó propuestes innovadores como l’Aula Didáctica de Tito Bustillo, zarrando esti ciclu históricu de la investigación científica paleolítica, a les puertes del sieglu XXI.

Figura 1. Escavaciones arqueolóxiques nel Área d’Estancia de la cueva de Tito Bustillo, campaña de 1974. D’esquierda a derecha: Carmen Cacho, Teresa Chapa, Federico Bernaldo de Quirós, M.ª Isabel Martínez Navarrete, Mercedes Cano, Victoria Cabrera y K. Flataker. De pies: Alfonso Moure y Pedro Saura. Semeya: Archivu Moure-Ortega.
Figura 2. Documentación d’Alfonso Moure y Rodrigo de Balbín del Gran Panel de la cueva de Tito Bustillo. Semeya: Archivu Moure-Ortega.
Figura 3. Rexistru fotográficu de Julián Bécares de les escavaciones arqueolóxiques en Cova Rosa. Semeya: Alejandro Gómez Fuentes.
Figura 4. Equipu d’escavación na campaña de 1991 na cueva de La Güelga, onde se reconoz a Alberto Martínez Villa y a José Manuel Quesada. Semeya cortesía d’Alberto Martínez Villa.

6. Manuel Mallo Viesca (Avilés, 1934)

Collaborador de Francisco Jordá Cerdá dende la so etapa n’Asturies, la so rellación perduró nel tiempu hasta’l fallecimientu d’aquel, col que forxó una gran amistá. Esta rellación llevólu a la esploración de cueves nes cuenques del Nalón, Nora, Narcea y Sella, la revisión del estáu de xacimientos arqueolóxicos bien conocíos y el reconocimientu de les playes asturianes en busca de restos arqueolóxicos. Informante cualificáu de tou descubrimientu importante que tuviere llugar n’Asturies nos años sesenta y peresperimentáu nel trabayu de campu, foi quien alvirtió al so amigu de la importancia del xacimientu de la cueva de Les Caldes, del sitiu al aire llibre de Bañugues y de les cueves con arte postpaleolíticu de Fresnéu (Teberga). Amás, xuntos estudiaron les pintures y grabaos de Les Pedroses, nel valle del Sella, anque la so publicación apaeció tardíamente.

A últimos de los sesenta yera ún de los arqueólogos más adiestraos y competentes colos que se podía cuntar n’Asturies. Desempeñó les sos investigaciones na Sección d’Estudios Históricos Avilesinos, de la que yera’l so responsable, y nel Grupu d’Esploraciones Soterrañes d’Asturies, que yera la sección espeleolóxica de la Federación Asturiana de Montañismu, onde actuaba como «asesor arqueolóxicu». Por eso nun sorpriende a naide que formase parte del grupu d’espeleólogos que realizó les primeres esploraciones nel complexu kársticu d’El Pozu’l Ramu (actual Tito Bustillo) a los pocos díes del descubrimientu y acompañase a F. Jordá Cerdá cuasi un añu depués.

Figura 1. Manuel Mallo. Semeya: Archivu Manuel Mallo.
Figura 2. Manuel Mallo Viesca nes Xornaes Espeleolóxiques Asturianes, Ribeseya,1968. Semeya: Archivu Manuel Mallo.

7. MIGUEL ÁNGEL GARCÍA GUINEA (Alceda, 1922 – Mompía, 2012)

Miguel Ángel García Guinea foi una de les figures más destacaes de l’arqueoloxía española del sieglu XX, reconocíu particularmente pol so llabor como investigador, xestor cultural y divulgador del patrimoniu.

La so trayectoria n’Arqueoloxía caracterizóse pola amplitú cronolóxica y xeográfica de les sos investigaciones. Nel ámbitu peninsular, dirixó más de cuarenta campañes d’escavación. Anque los más de los sos trabayos de campu se centraron en xacimientos de dómina histórica, la Prehistoria nun-y foi ayena. Asina, dirixó escavaciones arqueolóxiques en delles cueves de Cantabria, ente les que s’atopen La Chora, El Otero y Cualventi.

Al respective de les investigaciones nel valle del Sella, realizó una única campaña d’escavación na cueva de Tito Bustillo nel añu 1970. Intervieno en dos zones, nel Área d’Estancia, cerca de la entrada vieya a la cavidá, güei colapsada por un esbarrumbu, y nel Área de Decoración, baxo’l Panel Principal. En dambes zones documentó delles ocupaciones adscrites al periodu Magdaleniense.

La continuidá de trabayos arqueolóxicos na cueva viose truncada por dellos motivos, ente los que destaquen les tensiones institucionales col Patronatu de Cueves y Xacimientos Prehistóricos y Protohistóricos d’Asturies. La publicación de los trabayos arqueolóxicos de la única campaña d’escavación que realizó, cola collaboración de Carolina Fuentes, Manuel Meijide y Benito Madariaga, convirtióse nuna referencia imprescindible pa les investigaciones posteriores llevaes alantre na cavidá.

Figura 1. Miguel Ángel García Guinea. Semeya: Institutu Sautuola (Santander).
Figura 2. Miguel A. García Guinea y el so equipu na campaña de 1970 na cueva de Tito Bustillo.

8. MAGIN BERENGUER ALONSO (Uviéu, Asturias, 1918-2000)

Artista de formación, funcionariu provincial y profesor na Escuela d’Artes y Oficios d’Uviéu. Foi miembru del Institutu Arqueolóxicu Alemán pa la Península Ibérica dende 1955, académicu correspondiente de la Real Academia de Belles Artes de San Fernando dende 1958 y académicu correspondiente de la Real Academia de la Historia dende 1993.

Como responsable del catálogu Artísticu d’Asturies, ente 1954 y 1957 reprodució l’arte rupestre de delles cueves asturianes, incluyendo, dientro de la cuenca del Sella, El Buxu y Les Pedroses. Tres del descubrimientu de Tito Bustillo, ente 1969 y 1972 documentó y publicó dellos de los sos conxuntos decoraos, incluyendo dalgunos inéditos, como la Galería de los Caballos o les figures animales del que depués se conoció como Conxuntu I. De resultes d’estos trabayos, nel so archivu consérvense apuntes sobre dellos tipos de soporte y calcos sobre semeyes de detalle, realizaos en papel vexetal a tinta o a carbonizu, amás de dellos ensayos d’esperimentación sobre escayola.

Siendo la so figura propia d’una dómina onde les alministraciones provinciales teníen cada vez más responsabilidá en rellación col patrimoniu cultural, ensin cuntar nin colos recursos nin col personal necesario, la historia de la xestión y investigación del arte rupestre d’Asturies en xeneral, y de Tito Bustillo en particular, ye indisociable de l’actividá de Magín Berenguer a lo llargo de los más de cincuenta años qu’exerció profesionalmente.

Figura 1. Magín Berenguer Alonso. Semeya: Frente d’Afirmación Hispánica A. C.
Figura 2. Magín Berenguer y Aurelio Capín Alonso nel Panel Principal de la cueva de Tito Bustillo, 1970. Semeya: Archivu personal de la familia Berenguer Diez.

9. J. ALFONSO MOURE ROMANILLO (Santander, 1949 – Santander, 2023)

Catedráticu de Prehistoria de la Universidá de Cantabria, Alfonso Moure Romanillo foi una figura destacada na investigación y la divulgación sobre la Prehistoria española.

Les sos investigaciones centráronse nel Paleolíticu y les sos aportaciones desempeñaron un papel fundamental na renovación conceptual y metodolóxica qu’esperimentó la prehistoria española nos decenios de 1970 y 1980. Nesta renovación destacaron precisamente les investigaciones que dirixó neses dos décades na cueva de Tito Bustillo. Asina, a partir del añu 1972, y hasta 1986, realizó escavaciones arqueolóxiques nel Área d’Estancia, cerca de la entrada vieya a la cavidá, y en 1984, nel Área de Decoración, baxo’l Panel Principal. Tito Bustillo foi una verdadera escuela d’arqueoloxía de campu onde se formaron munchos de los principales especialistes na materia de los últimos años del sieglu XX.

Pa realizar les sos investigaciones na cueva, A. Moure reunió un grupu interdisciplinar modélicu formáu, ente otros, por Jesús Altuna, Anaïs Boyer-Klein, M.ª Dolores Garralda y Benito Madariaga de la Campa, al que se xuntó depués Rodrigo de Balbín, nesti casu nel estudiu del arte parietal.

Asina, el trabayu de campu na cavidá realizáu por A. Moure nun se limitó a la escavación, ya qu’amás llevó una investigación intensa sobre l’arte parietal en Tito Bustillo, contribuyendo a poner en valor el so patrimoniu tan ricu y a que nel añu 2008 esta cueva s’incluyere na Llista del Patrimoniu Mundial pola UNESCO.

Figura 1. Alfonso Moure Romanillo. Semeya: Archivu Moure-Ortega.
Figura 2. Escavaciones arqueolóxiques nel Área d’Estancia de la cueva de Tito Bustillo, campaña de 1974. D’esquierda a derecha: Victoria Cabrera, Mercedes Cano y Alfonso Moure. Semeya: Pedro Saura.

10. Emilio Olávarri Goicochea (Bilbao, 1929-Uviéu, 2002)

Interesáu polos estudios bíblicos, Emilo Olávarri realizó la tesis de diplomatura n’Arqueoloxía Oriental na École Biblique et Archéologique Française de Jerusalén y doctoróse en Teoloxía na Universidá de Santo Tomás de Aquino de Roma. Especialista n’Arqueoloxía d’Oriente Próximu, les sos investigaciones centráronse na Vieya Ciudá de Jerusalén, Jordania y Siria.

Foi profesor nel Seminariu Metropolitanu d’Uviéu, ente 1956 y 1999, canónigu maxistral de la Catedral d’Uviéu y encargáu de poner en marcha’l Muséu actual de la Ilesia de la Catedral d’Uviéu, del que foi’l primer director, actividaes que compaxinó col so llabor arqueolóxicu n’Oriente y n’Asturies. Foi director del Serviciu de Cueves y Xacimientos Prehistóricos de la Diputación d’Asturies (1970-1980), socesor del Serviciu d’Investigaciones Arqueolóxiques, dende onde escavó dellos xacimientos prehistóricos y monumentos históricos asturianos, aplicando la metodoloxía practicada n’Oriente Próximu.

La so intervención nel valle del Sella limitóse a la escavación de la cueva d’El Buxu en 1970, onde realizó delles cates y reconoció la existencia de niveles paleolíticos del Solutrense, que los sos materiales s’estudiaron años depués por un Mario Menéndez mozu na so tesis de llicenciatura, documentando una escultura d’ave realizada sobre un canil d’Ursus spelaeus que, ensin dulda, ye la representación de bultu redondu más vieya de la Prehistoria de la Península Ibérica.

Figura 1. Emilio Olávarri. Semeya cortesía de Lorenzo Arias.
Figura 2. Emilio Olávarri y Lorenzo Arias na escavación de Santa María del Naranco, campaña de 1985. Semeya: Lorenzo Arias.
Figura 3. Emilio Olávarri.

11. ALEJANDRO GÓMEZ FUENTES (Salamanca, 1944)

Alejandro Gómez Fuentes foi investigador y docente no qu’anguaño ye’l Departamentu de Prehistoria, Historia Antigua y Arqueoloxía de la Universidá de Salamanca.

Dende los sos primeros años como investigador, y nel marcu de la realización de la so tesis doctoral, implicóse activamente nes escavaciones arqueolóxiques realizaes nes cueves de Cova Rosa y El Cierru, codirixendo estes intervenciones con Francisco Jordá Cerdá y encarando l’estudiu de los materiales arqueolóxicos dende una perspectiva económica y social.

Nel casu de Cova Rosa, realizó escavaciones na zona del averu de la cueva ente los años 1975 y 1979, aplicando un método innovador d’escavación integral diseñáu por Javier Fortea. Con él buscaba comprender les formes económiques que podíen interpretase a partir de los suelos d’habitación y los pisos d’ocupación documentaos nel procesu d’escavación de la cueva.

Na cueva d’El Cierru intervino ente 1976 y 1979. Equí realizó un sondéu na güei nomada Depresión Zarrada Esterior y llevó alantre la llimpieza y la escavación na sección norte del xacimientu principal. La intervención nesta parte de la cavidá, posibilitó-y documentar una de les secuencies más importantes de la prehistoria peninsular, yá que compriende dende’l final del periodu Musteriense hasta época histórica. 35 años depués de la última intervención, nel añu 2014 regresa al xacimientu con Esteban Álvarez Fernández, quien va encargase depués de retomar les investigaciones na cavidá.

Figura 1: Alejandro Gómez Fuentes. Semeya por cortesía del investigador.
Figura 2. Escavaciones arqueolóxiques en Cova Rosa. A la esquierda, Alejandro Gómez Fuentes; a la derecha, Jesús F. Jordá Pardo. Semeya: Julián Bécares.

12. INVESTIGACIONES NES CASCARERES DE BAXU SELLA

L’interés poles cascareres asturienses empezó bien ceo nel valle del Sella, primero por parte de Justo del Castillo y Quintana y, depués, pol Conde de la Vega del Sella.

Nun va ser hasta la segunda década del sieglu XX cuando se retomen los estudios gracies, en particular, al llabor de trés investigadores: Geoffrey Clark, Manuel Ramón González Morales y Miguel Ángel Fano Martínez. Los trés realizaron les sos tesis doctorales sobre les ocupaciones mesolítiques na rexón cantábrica, onde s’incluyeron xacimientos nuevos en cueves asitiaes nel Baxu Sella.

Geoffrey A. Clark (1944), profesor de la Universidad Estatal d’Arizona, realizó muestreos a últimos de los años sesenta nes cascareres de La Lloseta, El Cierru, Les Pedroses, San Antonio y Tito Bustillo, amás de les primeres dataciones col métodu del carbonu 14 na rexón, lo que-y dexó confirmar la cronoloxía pospaleolítica del rexistru asturiense.

Manuel R. González Morales (1950), dende la Universidá d’Uviéu, prospectó y catalogó nos años setenta delles cascareres nes cueves de Ceñil, Xuncu, El Molín, El Cuetu la Hoz y La Molera. La so visión crítica al respective de les atribuciones cronolóxiques post-asturienses de dalgunos sitios resultó de gran interés.

Miguel Ángel Fano (1969 - 2024), dende la Universidá de Salamanca, y yá na segunda metá de los años noventa, contribuyó al descubrimientu d’esti tipu de contestos nes cueves de Bones, La Viesca y del Cementeriu.

Figura 1. Geoffrey A. Clark, nel centru, muestreando la boca antigua de la cueva de Tito Bustillo, añu 1969. A la derecha, Matilde Escortell; a la esquierda, Valerie A. Jackson. Semeya: Manuel Mallo.
Figura 2. D’esquierda a derecha, Geoffrey A. Clark, Juan A. Fernández-Tresguerres y Manuel R. González Morales a lo llargo de la escavación arqueolóxica na cueva de Los Azules, campaña de 1973 o 1974. Semeya: Manuel R. González Morales.
Figura 3. Miguel Ángel Fano Martínez y Carlos Duarte Simoes muestreando la cascarera cántabra d’Hoyo Laredo, Campaña del 2022. Semeya: A. León.

13. Francisco Javier Fortea Pérez (Arnedo, La Rioxa 1946- Uviéu, Asturies, 2009)

Discípulu de Francisco Jordá Cerdá na Universidá de Salamanca, onde se llicenció y doctoró, foi profesor d’esta universidá (1968-1978) y profesor agregáu d’Etnoloxía y Prehistoria (1978-1981) y depués catedráticu de Prehistoria de la Universidá d’Uviéu (1981-2009).

Los sos primeros años d’investigación centráronse en xacimientos d’Andalucía y del llevante mediterraneu, especializándose na arqueoloxía del Paleolíticu superior, l’Epipaleolíticu y la neolitización, amás de n’arte prehistóricu. El descubrimientu en 1978 del xacimientu de La Viña (Uviéu) determinó’l so establecimientu definitivu n’Asturies, onde centró la so actividad arqueolóxica principal na cuenca del Nalón y na exa Casaño-Cares-Deva.

La so carrera científica n’Asturies empezó de la mano del so maestru nes escavaciones en Cova Rosa y nes investigaciones en Tito Bustillo, y continuó na década de 1990 col so intentu de datación directa del arte paleolíticu asturianu, que resultó infructuosa nes cueves del Sella analizaes (El Buxu y Tito Bustillo).

Pero la so actividá principal nel valle del Sella centróse nel xacimientu neandertal d’El Sidrón, asitiáu na cuenca del so tributariu, el Piloña, qu’escavó xunto a Marco de la Rasilla dende’l 2000 hasta’l so fallecimientu. Nesta cueva coordinó un equipu multidisciplinar ampliu que sacó alantre ún de los xacimientos neandertales más importantes del mundu, onde desenvolvieron una metodoloxía específica pa la estracción de los fósiles humanos y la so correllación cola industria llítica existente, la investigación del contestu xeológicu y cronocultural y l’estudiu del arte rupestre del xacimientu.

Figura 1: Javier Fortea na escavación de la cueva del Sidrón, Campaña del 2006. Semeya: Equipu d’investigación d’El Sidrón.
Figura 2: Equipu de trabayu de la cueva del Sidrón, campaña del 2007. D’abaxu arriba: J. Fortea, Aurora Rodríguez, Araceli Soto, Zorione Torrontegui, David Santamaría, Ignacio Barandiarán, Ana Cava, Elsa Duarte, M. de la Rasilla, Enrique Martínez, Jose M.ª Vázquez, Lucía Martínez y Juan Trenor. Semeya: Equipu d’investigación d’El Sidrón.

14. Juan Antonio Fernández-Tresguerres Velasco (Mieres, 1941 – Uviéu, 2011)

Juan Antonio Fernández-Tresguerres foi docente y investigador nel Departamentu d’Historia de la Universidá d’Uviéu. La so vida tuvo marcada pola pertenencia a la orde dominica.

La so investigación tuvo centrada en dos llinies de trabayu: una, focalizada n’arqueoloxía del Oriente Próximu, onde escavó dellos xacimientos en Palestina (Tell el-Far'ah) y Jordania (Khirbet Samra y Jebel Mutawwaq); otra, na escavación de la cueva de Los Azules, ún de los xacimientos de finales del Paleolíticu más destacaos del valle mediu d’El Ríu Sella.

Juan A. Fernández Tresguerres intervino en Los Azules ente los años 1973 y 1992. Estos trabayos encargólos Martín Almagro Basch, entós Comisariu Nacional d’Escavaciones. Estes escavaciones formaron a un númberu grande de prehistoriadores españoles, y dalgunos d’ellos participaron n’intervenciones arqueolóxiques con posterioridá nel valle del Sella, como ye’l casu de Carlos Pérez Suárez, Pablo Arias y Alberto Martínez Villa.

La escavación practicada na cueva de Los Azules ye, hasta’l momentu, onde se realizaron más campañes de forma continua (anuales) nun xacimientu prehistóricu asturianu. Na cavidá documentó la secuencia aziliense más importante de la rexón cantábrica, amás d’una de les escases tumbes d’época prehistórica atopaes en posición primaria na rexón mentada. L’oxetivu fundamental de les investigaciones de Juan A. Fernández-Tresguerres yera la de conocer a los grupos azilienses dende perspectives diferentes, incluyendo les sos industries, la economía, la espiritualidá y l’arte, amás de la so rellación col espaciu prehistóricu.

Figura 1. Juan Antonio Fernández-Tresguerres Velasco na cueva de los Azules. Semeya: Manuel R. González Morales.
Figura 2. Detalle del enterramientu aziliense documentáu nes escavaciones azilienses de la cueva de los Azules. Semeya: Juan A. Fernández-Tresguerres.

15. Mario Menéndez Fernández (Miranda, 1954)

Esti prehistoriador asturianu comenzó estudiando’l primer ciclu de la llicenciatura n’Historia na Universidá d’Uviéu primero de llicenciase cola especialidá d’Arqueoloxía na Universidá Autónoma de Madrid, en 1980. Vinculáu dende entós a Emilio Olávarri, regresó a Asturies pa preparar una tesina sobre la cueva d’El Buxu —defendida en 1982 y publicada en 1984— y, después d’un contratu curtiu nel Muséu Arqueolóxicu d’Asturies, treslladóse a Madrid como profesor-tutor de Prehistoria na UNED (1982/83). En 1987 defendió la so tesis doctoral y, nesi mesmu añu, incorporóse como profesor al departamentu de Prehistoria de la UCM, onde permaneció ente 1987 y 1993, añu nel qu’obtuvo por oposición una plaza de profesor titular na UNED, onde llegó a ser catedráticu nel 2018. Amás, ente’l 2002 y el 2014 dirixó’l Centru Asociáu de la UNED n’Asturies.

La so actividá arqueolóxica nel valle del Sella concentróse sobre manera en Cangues d’Onís, concretamente nes cueves d’El Buxu y La Güelga. N’El Buxu dirixó cuatro campañes ente 1986 y 1989 y, nel 2016, coordinó una monografía integral sobre’l xacimientu y el so arte parietal. En La Güelga dirixó escavaciones, primero ente 1989 y 1992 na zona A (ocupaciones madalenienses), y años depués, ente 1999 y el 2010, fundamentalmente yá na zona D, onde intervino en dos sectores (interior y esterior), con niveles musterienses, auriñacienses y chatelperronienses, siendo esti xacimientu una de les referencies principales pa la transición Paleolíticu mediu–superior na rexón Cantábrica.

Figura 1. Mario Menéndez Fernández (Semeya cortesía del investigador).
Figura 2. Escavaciones arqueolóxiques na cueva de La Güelga, campaña del 2012 (Semeya cortesía Mario Menéndez).

16. RODRIGO DE BALBÍN BEHRMANN (Madrid, 1946)

Rodrigo de Balbín ye ún de los investigadores españoles más destacaos nel estudiu del arte prehistóricu.

Ente finales de los años setenta y empiezos de los ochenta del sieglu pasáu esti investigador integróse nel proyectu de documentación del arte parietal na cueva de Tito Bustillo, empezáu años atrás por Alfonso Moure Romanillo. Equí incorporó la primer ficha pa homologar les descripciones del rexistru gráficu que se diba usar depués na documentación de les cueves paleolítiques españoles. Amás, emplegó de forma sistemática la fotografía como ferramienta científica pal estudiu del arte prehistóricu. A partir de 1998 Rodrigo de Balbín y el so equipu, con sede na Universidá d’Alcalá, regresaron a Tito Bustillo pa siguir col estudiu de les manifestaciones artístiques. Revisaron, amás, les d’otres cueves localizaes nel cursu baxu del Sella, en particular La Lloseta y San Antonio, onde descubrieron manifestaciones parietales nueves. La so investigación centróse nel análisis de les cavidaes dende una perspectiva integral, concibiéndoles como espacios onde l’arte se rellaciona con una variedá d’actividaes desenvueltes polos grupos humanos nel interior del karst.

Nesti sentíu, amás de la realización d’estudios del arte parietal, ente los años 2001 y 2007 R. de Balbín y el so equipu fixeron escavaciones arqueolóxiques, prospecciones y sondeos en zones diferentes de la cueva de Tito Bustillo (Vestíbulu, Cuevina, Coxu, etc.), pero tamién en La Cuevona d’Ardines y na Galería del Tránsitu de La Lloseta.

Figura 1. Rodrigo de Balbín Behrmann. Semeya cortesía del investigador.
Figura 2. Escavaciones arqueolóxiques nel «Sondéu Cuevina» de la cueva de Tito Bustillo, campaña del 2007. Semeya: Rodrigo de Balbín.

17. LES INVESTIGACIONES NEL VALLE DEL SELLA NEL SIEGLU XXI

Nos últimos 25 años prodúxose una verdadera reactivación nos estudios sobre los grupos de cazadores-recolectores-mariscadores nel valle del Sella.

Al respective de les intervenciones arqueolóxiques, dirixéronse dende universidaes (Salamanca, UNED, Uviéu, Cantabria, Autónoma de Barcelona y Complutense de Madrid) y centros d’investigación (CSIC y Sociedá de Ciencies Aranzadi).

Nel cursu baxu del Sella escavóse en Cova Rosa y El Cierru (sección norte del xacimientu principal y sala de la Natividá) por un equipu supervisáu por Esteban Álvarez Fernández y Jesús F. Jordá Pardo; en Les Pedroses y La Lloseta, por Alberto Martínez Villa; y en zones estremaes de la cueva de Tito Bustillo (escavaciones d’Esteban Álvarez Fernández, Marián Cueto y Jesús Tapia nel Área d’Estancia; del equipu de Rodrigo del Balbín en Coxu, Cuevina y Covacha esterior, etc.). Nel cursu mediu del Sella l’equipu de Mario Menéndez llevó a cabu escavaciones en La Güelga, y el de David Álvarez Alonso, en Los Azules. Inclúyense, amás, les intervenciones realizaes n’El Sidrón (valle del ríu Piloña), por parte del equipu dirixíu primero por Javier Fortea y, depués, por Marco de la Rasilla, y les efectuaes por Ana Pinto en Sopeña (valle d’El Ríu Güeña). Nel cursu altu d’El Ríu Sella, José Manuel Quesada intervino na cueva de Collubil.

Nun falten investigaciones específiques sobre l’arte parietal. Hai que remarcar les realizaes pol equipu de Rodrigo de Balbín nel Baxu Sella (por exemplu, en Tito Bustillo), amás del descubrimientu d’arte parietal n’El Sidrón. Na última década, y dende la UNED, defendiéronse les tesis doctorales de Beatriz García Alonso, sobre los pigmentos de la cueva d’El Buxu, y la d’Alberto Martínez Villa, que revisó les manifestaciones parietales conocíes nel valle del Sella y onde incluyó estaciones nueves (La Viesca y Pruneda).

Pa rematar, lleváronse a cabu otres intervenciones arqueolóxiques, onde s’incluyen sondeos (por exemplu, en delles cavidaes localizaes nel Güeña Altu por parte d’Ana Pinto) y prospecciones (en particular, por Javier Fernández Yrigoyen nes terraces de los cursos baxu y mediu d’El Ríu Sella), pero tamién los muestreos (cáscares, ocre, etc.) nun númberu considerable de cavidaes cola mira de facer estudios específicos sobre cronoloxía, estacionalidá, etc.

Figura 1. Jesús Tapia y Jesús F. Jordá Pardo muestreando los sedimentos del Área d’Estancia de la cueva de Tito Bustillo, campaña del 2022. Semeya: Luis Teira.
Figura 2. Escavaciones arqueolóxiques na Sala de la Natividá de la cueva d’El Cierru, campaña del 2022. Semeya: Jesús F. Jordá Pardo.
Figura 3. Escavaciones arqueolóxiques na cueva de la Güelga, campaña del 2012. Semeya cortesía de Mario Menéndez.
Figura 4. Escavaciones arqueolóxiques na cueva d’El Sidrón, campaña del 2012. Semeya cortesía de Nel Acebal.

19.- L’ARTE PALEOLÍTICU NEL VALLE DEL SELLA

El valle del Sella incorpórase con un ciertu retrasu a los primeros descubrimientos d’arte paleolíticu al respective d’otres árees españoles y franceses. Les cueves de San Antoniu (1912) y El Buxu (1914) abren una llista que se va dir incrementando a lo llargo del sieglu XX. Ente los primeros investigadores qu’estudien l’arte destaquen Hugo Obermaier, Henri Breuil, Eduardo Hernández-Pacheco y el Conde de la Vega del Sella.

La Guerra Civil y los primeros años de la posguerra supunxeron un corte estéril na investigación y el conocimientu científicu. Esta inactividá va empezar a cambiar cola llegada en 1952 al Serviciu d’Investigaciones Arqueolóxiques de Francisco Jordá Cerdá, que da un ritmu fuerte a les investigaciones arqueolóxiques na rexón. Ente 1956 y 1958 descubrió l’arte de la cueva de Les Pedroses y realiza dalgunos trabayos na cueva d’El Buxu.

L’annus mirábilis va ser 1968. Descúbrese la cueva de Tito Bustillo, lo que va marcar un momentu d’inflexón nes investigaciones del arte parietal. Hasta l’añu 1972, Magín Berenguer lideró los primeros trabayos. A lo llargo d’esti periodu fixéronse les primeres publicaciones, ente les que destaquen les aportaciones de Francisco Jordá, Manuel Mallo, Antonio Beltrán y Martín Almagro.

La llegada en 1972 del profesor Alfonso Moure a Tito Bustillo abrió unes espectatives nueves y dio impulsu a la investigación d’esti xacimientu. Oxetivos y métodos nuevos integren la cueva nes corrientes d’investigación nueves. Alfonso Moure xunto al so equipu comenzaron la revisión fondera del arte de Tito Bustillo. Les representaciones parietales de La Lloseta descubriéronse en 1968 por integrantes del grupo GESA y estudiáronse por Manuel Mallo y Manuel Pérez.

Ente 1979 y 1983 incorpórase Rodrigo Balbín a los trabayos de Tito Bustillo. Esti arqueólogu va estudiar y publicar xunto a Alfonso Moure la mayor parte de los conxuntos con arte d’esta cavidá. Estos son años de gran actividá arqueolóxica nel valle d’El Ríu Sella. Asina por exemplu, Juan A. Fernández-Tresguerres va estudiar los cantos pintaos de Los Azules y Manuel González-Morales y M.ª Carmen Márquez van dar a conocer los grabaos esteriores na Cuevona d’Ardines.

De nuevo, a últimos del sieglu XX, R. Balbín xunto a Javier Alcolea van retomar la investigación en Tito Bustillo y, en xeneral, en La Moría d’Ardines, sobre manera na cueva de La Lloseta.

Avanzáu’l sieglu XXI, Alberto Martínez-Villa revisa l’arte de Les Pedroses, La Lloseta, El Molín o Pruneda. Xunto a Marelia Gil, realiza descubrimientos nuevos como los grabaos de La Viesca. Estes investigaciones enmárquense en grandes proyectos d’investigación lideraos poles universidaes de Salamanca, UNED y Cantabria.

Figura 1. Documentación del arte parietal de la cueva de Tito Bustillo, campaña de 1981. D’esquierda a derecha: Alfonso Moure, Rodrigo de Balbín, E. Martín, R. Silió y Lourdes Ortega.
Figura 2. Alberto Martínez Villa documentando l’arte parietal de la cueva de Tito Bustillo, campaña del 2025.
Figura 3. Alfonso Moure Romanillo documentando l’arte parietal de la cueva de Tito Bustillo. Semeya: Archivu Moure-Ortega.
Figura 4. Alfonso Moure Romanillo documentando’l Panel Principal de la cueva de Tito Bustillo. Semeya: Archivu Moure-Ortega.
Figura 5. Trabayos de reproducción del Panel Principal de la cueva de Tito Bustillo realizaos por Pedro Saura y Matilde Múzquiz. Semeya: Archivo Pedro Saura.

20. «El Sella en femenín»

La investigación sobre los grupos de cazadores recolectores del Paleolíticu y el Mesolítico cunta con una trayectoria d’investigación amplia dende últimos del sieglu XIX y empiezos del XX. Sicasí, la participación de les investigadores nestos primeros momentos ta prácticamente ausente. Los descubrimientos y escavaciones arqueolóxiques de la década de 1970 marcaron l’empiezu de la participación de les investigadores. Les referencies disponibles señalen la presencia de munches muyeres nel Grupu de Monte Torreblanca qu’en 1968 esploraron la cavidá de Tito Bustillo. Delles investigadores, collaboradores nes escavaciones dirixíes por Francisco Jordá en Cova Rosa, desenvolvieron con posterioridá una actividá científica estensa nel estudiu de les sociedaes de cazadores recolectores paleolíticos.

El papel de les investigadores foi relevante sobre manera nel estudiu de materiales arqueolóxicos procedentes de les escavaciones que se fixeron na contornada del Sella y que taben depositaos en dellos centros, como’l Muséu Arqueolóxicu d’Asturies y el Muséu Nacional de Ciencies Naturales. Ente los años 1970 y 1990, los materiales arqueolóxicos de La Cuevona, la Cueva del ríu d’Ardines, Tito Bustillo, El Cierru, Cova Rosa o La Lloseta foron oxetu de dellos trabayos académicos (memories de llicenciatura y tesis doctorales) y publicaciones científiques específiques, onde s’encara, ente otros, la industria llítica, ósea, los colorantes. Esta tendencia caltiénse na década de 1990, na que s’estudien y publiquen los análisis de los restos malacolóxicos, ictiolóxicos, paleoantropolóxicos y arqueozoolóxicos de xacimientos tan emblemáticos como Tito Bustillo.

Esti papel tan destacáu de les investigadores nel estudiu y revisión de materiales nun se reflexa na dirección d’intervenciones arqueolóxiques. Les escavaciones en cueves como Tito Bustillo (década de 1970 y na actualidá) o Sopeña cuntaron cola dirección efectiva de muyeres.

Como tendencia xeneral, l’actividá científica llevada a cabu poles investigadores centróse nel estudiu sistemáticu de los materiales arqueolóxicos de cronoloxía pleistocena. Nos últimos años, l’afianzamientu de los equipos d’investigación interdisciplinares cunta cola participación d’un númberu eleváu d’investigadores qu’encaren l’estudiu d’aspectos estremaos (xeológicos, etc.), aportando una información relevante na reconstrucción de les maneres de vida de los cazadores recolectores pleistocenos. Como contrapartida, l’estudiu de los grupos de cazadores-recolectores de cronoloxía holocena adolez d’una actividá investigadora menor, dada la menor visibilidá arqueolóxica d’estos momentos de la Prehistoria.

Figura 1. Escavaciones arqueolóxiques en Cova Rosa, campaña de 1975. Nel grupu de trabayu se pueden reconocer nel centru, sentaes, a Pilar Utrilla Miranda y a Socorro López Plaza, amás d’a Francisco Jordá Cerdá, Julián Bécares y Jesús F. Jordá Pardo. Semeya: Javier Fortea.
Figura 2. Marián Cueto y Esteban Álvarez Fernández nes escavaciones arqueolóxiques nel Área d’Estancia de Tito Bustillo, campaña del 2020. Semeya: Luis Teira.
Figura 3. Ana C. Llona nes escavaciones arqueolóxiques na cueva de Sopeña, campaña del 2015. Semeya: cortesía de la investigadora.