¡Conecta col Centru!

Alcuentru online

La visita al Centru ye una actividá qu’hai que planificar con antelación. Polo tanto, proponemos una reunión vía Teams onde vamos presentate’l nuestru equipamientu, les instalaciones, los servicios qu’ufiertamos, la propuesta de visites y actividaes pa escolinos, amás del nuestru programa didácticu.

Feches: a demanda.

Condiciones: precisa de reserva previa con un mínimu de dos selmanes d’antelación.

Cómo participar: esta actividá ye gratuita y precisa de reserva previa al traviés del corréu reservas@turismoycultura.asturias.es.

Tipos de visita

  • Grupos hasta 20 persones. Pueden atendese namás dos grupos de manera simultánea.
  • La visita o’l taller pue facese n’inglés y francés nos meses de payares, avientu y febreru.

 

Visita llibre

El Centru pue vese por llibre con ayuda d’una guía de mano (castellanu, asturianu, inglés, francés, alemán y catalán) o al traviés de l’audioguía de l’APP móvil (castellanu, asturianu, inglés, francés y alemán). Tamién pue descargase una audioguía con un discursu más adaptáu al públicu infantil (castellanu y asturianu).
 

Visita guiada al Centru d'Arte Rupestre de Tito Bustillo

Un percorríu guiáu (45 minutos) adaptáu a tolos ciclos educativos pela esposición permanente del Centru, pa conocer cómo foi’l descubrimientu de la cueva, la xeoloxía de La Moría d’Ardines, cómo yera la vida na Prehistoria o descubrir dalguna de les "ayalgues" de la Cueva que tán zarraes al públicu por conservación de les pintures.

Gratuitu pa centros escolares (depués de facer solicitú de gratuidá con una selmana d’antelación). 

 

Taller didácticu "Pintamos con arte"

Taller d’arqueoloxía esperimental (45 minutos) adaptable a tolos ciclos educativos onde’l grupu va poner en práctica les técniques usaes nel arte rupestre al traviés del usu de plantíes, carbón vexetal y óxidu tal como lo diba facer l’artista paleolíticu. 

Preciu: 2 €/participante*.

La entrada a la cueva d’El Pozu’l Ramu y a La Cuevona tamién ye gratuita pa centros escolares depués de la solicitú de gratuidá.  
 

Visita a la Cueva d'El Pozu'l Ramu

Una visita guiada d’una hora de duración centrada nel arte rupestre del Panel Principal de la Cueva d’El Pozu’l Ramu, declarada Patrimoniu Mundial pola UNESCO.

La temporada de visites de Cueva d’El Pozu’l Ramu remata’l 30 d’ochobre del 2026. El calendariu d’apertura previstu pal añu 2027 ye pa los meses de marzu a ochobre.  

Accesu restrinxíu a menores de 7 años. Les visites tán limitaes a un númberu de 15 persones por pase, de miércoles a domingu, de 10:15 hores a 17:00 hores cada 45 minutos.
 
 

Visita a La Cuevona d'Ardines

Una visita guiada de 45 minutos de duración centrada na xeoloxía d’una de les cueves de La Moría d’Ardines más espectaculares onde destaca la so cúpula tan escomanada.

P’acceder a La Cuevona d’Ardines hai que xubir 300 escalones.

La Cuevona d’Ardines ta zarrada temporalmente.

 

Visita conxunta col Centru de Formación pal Consumu

L’actividá va facese de forma conxunta col Centru de Formación pal Consumu de Ribeseya, de manera que los grupos van facer un itinerariu completu peles instalaciones de dambos centros col que van descubrir una visión amplia sobre’l sistema de vida de los nuestros antepasaos va 20.000 años, la contornada onde se desenvolvíen, la dieta que teníen y cómo afectaba ésta a la so morfoloxía característica. L’oxetivu principal ye conocer el modelu de consumu prehistóricu y la so evolución hasta l’actual, mostrando nexos, alcuentros y desalcuentros tocante a sostenibilidá medioambiental, aprovechamientu de recursos y alimentación saludable. Va facese los meses de payares, avientu y febreru. 

Pa trabayar nel aula

Material didáctico

El Centru d’Arte Rupestre dispón de material complementario d’apoyu pa la preparación primero de visitar el Centru. Nesti enllaz pue descargase la Guía Didáctica:

Descargar la Guía del profesoráu del Centru Tito Bustillo

Descargar la Guía del alumnáu del Centru Tito Bustillo

Amás, hai disponibles pa descargar Cuadernos de trabayu de la cueva d’El Pozu’l Ramu y La Moría d’Ardines (ellaboraos pol Centru de Profesoráu y de Recursos d’Oriente). Desque se descargue l’archivu, descomprimir nuna carpeta y executar el ficheru inicio.pps. Descargar en zip

 

Maleta didáctica

La nuestra maleta didáctica viaxera contién répliques d’útiles prehistóricos ellaboraos en güesu, piedra, cuerna o madera que yá usaben los nuestros antepasaos pa la caza, pesca, recolección o pintura. Puedes trabayar con esta maleta en dos formatos: el nuestru personal va al centru escolar y fai un taller didácticu o’l propiu centru escolar, depués de solicitala, pue recoyer la maleta en Llaboral Ciudá de la Cultura o pidir que-y la unvien per corréu y trabayar con ella coles fiches esplicatives disponibles pa descargar. Solicitúes de la maleta al traviés de reservas@turismoycultura.asturias.es. 

 

Serviciu de bibliografía n'empréstamu

El Centru ufierta esti serviciu gratuitu tanto pa docentes como p’alumnáu cola mira de que pueda ser d’utilidá de la que s’imparte materia rellacionada cola Prehistoria. La nuestra biblioteca incluye bibliografía especializada, infantil y moza en castellanu, inglés y francés con dalgunos exemplares turísticos sobre Ribeseya. Consulta procedimientu y llibros disponibles.

 

Otros recursos prehistóricos

Recursos didácticos gratuitos como vídeos, visites guiaes virtuales, tutoriales, xuegos, etc. n’apartáu Multimedia de la web.

 

Concursu escolar

El Centru d’Arte Rupestre entama la IV edición del concursu escolar Noticiariu cavernícola. ¿Dibes ser quién a facer un noticiariu o un anunciu dende la Prehistoria? 

El plazu d’unviu de los trabayos va acabar el 11 d’avientu del 2026 a les 14:00 hores. Descargar les Bases del concursu.

Xestiona la to reserva

Actividaes a midida: si yá nos visitasti y quies facer otra actividá, ponte en contactu col Centru y, a tenor del númberu de persones del grupu y edá, vamos diseñar l’actividá que más s’afaiga al grupu. Tamién podemos apurri-y presupuestu de tresporte dende’l so sitiu d’orixe n’Asturies d’alcuerdu col itinerariu escoyíu.

Novedaes pa esti cursu: renovamos dellos espacios col Plan de Recuperación, Tresformación y Resiliencia, financiáu pola Unión Europea - Next GenerationEU: un xuegu interactivu pa ún de los pasiyos de transición ente sales, ameyoróse la calidá del audiovisual del Panel Principal na sala 4 y reformóse la sala 6 implementando xuegos y actividaes educatives nuevos colos qu’afondar de manera amena y prestosa na vida de la Prehistoria.

Reserves: pueden tramitase:

  • nos teléfonos 902 306 600 - 985 185 860. Nesti teléfonu tamién vamos resolver toles duldes que surdan al pensar na visita al Centru.
  • al traviés del mail reservas@turismoycultura.asturias.es unviando formulariu de reserva. 

 

SOLICITÚ DE RESERVA CURSO ESCOLAR 2025-2026

Condiciones de visita y forma de pagu cursu escolar 2025-2026

 

*Tarifes pal añu 2026. Los precios pueden revisase anualmente y sufrir un incrementu qu’aveza a ser equivalente a la xuba del IPC.