Premesozoicu
Nesta sala ta representáu´l tiempu trescurríu dende la formación de la Tierra, va unos 4.500 millones d´años, hasta´l final de la Era Paleozoica, 252 millones d´años atrás.
Ente otros aspectos figuren los primeros organismos que poblaron la Tierra, indicaciones pa entender qué ye y cómo se forma un fósil y los métodos pa determinar la so edá.
Tamién s´inclúi nesti espaciu una clasificación de los vertebraos y les sos rellaciones de parentescu. L´empiezu de la vida na Tierra tuvo llugar va unos 3.500 millones d´años; dende entós el nuestru planeta esperimentó importantes cambeos que permitieron el so desarrollu y diversificación, mentanto qu´otros organismos resultaron perxudicaos y foron conducíos en munchos casos a la so desapaición.
Esta estinción, que se produz a finales del Paleozoicu, foi la más devastadora porque supunxo la desapaición del 96% de los organismos.
Triásicu
El Triásicu, dende 251 hasta los 200 millones d´años, constitúi´l periodu nel qu´apaecieron los dinosaurios. Esta sala amuesa la bioloxía d´estos fabulosos reptiles, que se reconstrúi non solo a partir de los sos güesos, sinón tamién de les buelgues de pisada o icnites, gastrolitos (piedres qu´inxeríen dellos dinosaurios pa triturar los alimentos nel estómagu), coprolitos o escrementos fósiles, güevos y niales. Amás, preténdese que l´espectador sía capaz de percibir la diferencia qu´hai ente un dinosauriu y otros reptiles.
Como representantes característicos d´esti períodu escoyéronse los dinosaurios más antiguos, meyor conocíos y de mayor tamañu de la so dómina qu´esistieron n´Europa: los Plateosaurus.
Otru espaciu de la sala ta destináu a los xacimientos de Montral-Alcover, asitiaos na Sierra de Prades (Tarragona).
Nuna de les parés de la rampla perimetral de la sala amuésense, amás, dellos retratos de prestixosos investigadores rellacionaos col mundu de los dinosaurios.
Xurásicu
El Xurásicu constitúi´l periodu que ta metanes del Mesozoicu (ente los 201 y los 145 millones d´años); el terciu final del mesmu considérase una de les dómines de máximu esplendor de los dinosaurios, especialmente de los grandes saurópodos.
La información básica que pretende tresmitise al visitante nesta sala céntrase na clasificación y nes rellaciones de parentescu ente estos singulares reptiles representaes per aciu d´un cladograma, mesmo que na definición de los rasgos más característicos de los principales grupos.
L´área dedicada a los saurópodos afítase de mou especial n´estremaos aspectos anatómicos tales como´l pesu, suxeción del cuellu, musculatura de los brazos, aparatu circulatoriu y tamañu relativu del craniu.
L´área de los terópodos ta enfocada nos elementos ofensivos de los dinosaurios, principalmente dientes y garres.
La parte espositiva dedicada a los ornitópodos céntrase naquellos rasgos morfolóxicos más rellacionaos cola so dieta vexetariana: focicu ensin dientes, bateríes dentaries, güesos del craniu móviles, desarrollu de carriellos y presencia de pezuñes nos pies.
Nel espaciu dedicáu a los tireóforos contémplense los principales elementos defensivos d´esti grupu de dinosaurios frente a los depredadores: escudos óseos, espines, maces caudales, etc.
La parte central de la sala ta ocupada pola cadarma d´un Camarasaurus, dinosauriu saurópodu de gran tamañu, frecuente nos xacimientos del centru y oeste de los Estaos Xuníos. Alredor del mesmu, reproduzse, nun gran panel curvu, el so aspectu en vida y el del ecosistema nel que taba integráu.
Na paré de la rampla qu´arrodia la sala central hai un espaciu dedicáu a los famosos xacimientos de Hozmaden n´Alemaña. Nél espónse un panel retroillumináu que representa una reproducción del ecosistema de vertebraos marinos xurásicos, ente los que s´atopen grandes reptiles como ictiosaurios y plesiosaurios, cocodrilos y pexes. Nuna vitrina axacente amuésense amás répliques de la cadarma d´un ictiosauriu (reptil pisciforme asemeyáu a un golfín) y la d´un lliriu de mar o crinoideu.
Sala d´Introuducción al Xurásico Asturianu
Los afloramientos más espectaculares con peña del Xurásicu na rexón espárdense de forma cuasimente continua ente Xixón y Ribeseya, no que se conoz como “La Costa de los Dinosaurios”.
La peña axúntase en conxuntos llamaos formaciones. La representación gráfica d´ello, ordenao verticalmente de más vieyo a más moderno, conozse como columna estratigráfica. Cada Formación recibe´l nome del llugar o accidente xeográficu más averáu al sitiu onde esta peña amuesa les meyores condiciones pal so estudiu; nel casu del Xurásicu Asturianu seríen Xixón, Rodiles, Vega, Tereñes y Llastres.
La distribución de tierra y mar nel Xurásicu Inferior y Superior, amás de la localización d´Asturies naquellos momentos, pue observase nún de los paneles retroilluminaos d’esta sala. A primeros del Xurásicu empezó a xebrase´l supercontinente Panxea y abriéronse les primeres víes d´agua ente los continentes norteamericanu y euroasiáticu que constituyeron el niciu del océanu Atlánticu actual.
Los cambeos paleoxeográficos que se dieron de contino na nuestra rexón a lo llargo de los 56 millones d´años que duró´l Xurásicu, condicionaron l´alternancia d´etapes nes qu´Asturies tuvo cubierto pola mar, riques en fósiles d’invertebraos y de reptiles marinos, con otres nes que la retirada de la mar dio pasu a ecosistemes terrestres y llitorales dominaos por dinosaurios, cocodrilos, tortugues y pexes. Naquella dómina, los reis indiscutibles del aire yeren los reptiles esnaladores (pterosaurios).
¿Sabíes que´l conxuntu de buelgues de dinosaurios del MUXA representa la meyor colección d´Europa y la tercera a nivel mundial nun muséu? Esto ye non solo pol estáu de conservación tan escelente de munches d´elles, sinón tamién pola so diversidá y el númberu tan altu d´exemplares recoyíos. Nesta sala puen contemplase amás delles pieces escepcionales del Xurásicu asturianu tanto de vertebraos (dinosaurios y otros reptiles) como d´invertebraos.
Xurásicu asturianu
Nel percorríu inicial d´esta sala amuésense, en términos xenerales, los conxuntos de peña (formaciones) y fósiles representativos de los ambientes qu´existieron n´Asturies a lo llargo d´esti periodu del Mesozoicu. Destaquen equí múltiples exemplares d´invertebraos como ofiures, braquiópodos con petroleu, esponxes, bivalvos, ammonites, etc. Tamién puen contemplase les impresiones de gotes d´agua y delles especies vexetales.
La vitrina dedicada a los de fósiles de vertebraos xurásicos enseña una mínima parte de les buelgues de pisaes y restos óseos que formen parte de los fondos del MUXA (espónense alredor de 200 fósiles); esti conxuntu ye´l meyor y más completu rexistru fósil del territoriu español pa esti periodu. Destaquen sobre manera les icnites d’estegosaurios, dalguna con impresiones de la pelleya, relativamente escases a nivel mundial, les buelgues de reptiles esnaladores opterosaurios, una ulna (equivalente al nuestru cúbitu) de 1,25 m de llargor perteneciente a un saurópodu escomanáu, amás de dellos güesos d´estegosaurios, la cadarma d´un cocodrilu marín o´l craniu y cascu d´una tortuga. Amás, nesta vitrina, espónse la reproducción d´un rastru de dinosauriu bípedu nel que se representen dellos parámetros útiles pa reconocer diversos aspectos sobre les característiques y el comportamientu d´estos reptiles tan ablucantes.
N´otru de los espacios amuésase l´aplicación industrial de dellos materiales xurásicos como l´acebache, una de les xoyes más preciaes na cultura tradicional asturiana, o les variedaes de peña usaes na rexón, dende va sieglos, pa la construcción d´edificios.
La situación de los xacimientos d´icnites de “La Costa de los Dinosaurios” pue contemplase nuna semeya aérea asitiada enriba d´un panel retroillumináu.
Cretácicu
El Cretácicu, últimu períodu del Mesozoicu, va dende 145 hasta los 66 millones d´años.
Nesta sala´l visitante va tener accesu a información sobre´l comportamientu de los dinosaurios; conocemos, por exemplu, aspectos de la so reproducción (poníen los güevos en niales) o sobre´l so comportamientu social.
Trátase amás equí´l tema de la estinción de la mayoría de los dinosaurios de resultes d´un cúmulu d´acontecimientos que tuvieron llugar a finales del Cretácicu: impactu d´un meteoritu, erupciones volcániques y intensos cambeos xeográficos y climáticos. Unu de los espacios espositivos ta dedicáu espresamente al tránsitu ente los dinosaurios non avianos y les aves. Dende va años vien considerándose a estes últimes como un grupu especializáu de terópodos, hipótesis basada nes semeyances evolutives que presenta´l Archaeopteryx (ave primitiva) y dalgunos dinosaurios como Deinonychus o Dromaeosaurus.
Como representantes d´esti periodu, y ocupando´l círculu central de la sala, escoyóse a una pareya de Tyrannosaurus Rex, unu de los mayores depredadores terrestres na hestoria del nuestu planeta. Nuna de les ramples llaterales de la sala reproduzse l´escepcional xacimientu de Las Hoyas (en Cuenca), con una escepcional conservación de multitú de fósiles, ente los que destaquen ciertes aves primitives y restos óseos de dellos dinosaurios terópodos como Pelecanimimus.
Formulario de Contacto